Kunngip pania eertamik allialik _

Ilaanningooruna kunngip ernera kunngip panianik nuliartaarumagaluartoq, kisianni kunngip panianik nalinginnaanngitsumik. Taava silarsuaq tamaat angalaarpaa taamaattumik ujarlerluni, takusaraluili tamarmik ajoquteqalaararaat. Kunngip panippassuugaluarput, kisianni nalinginnaanngitsorisaminik nassaassaqanngilaq. Taava nunaminut utiinnarpoq assullu aliasuutigalugu kunngip panianik nalinginnaanngitsumik nassaarsinnaannginnini.

Unnuit arlaanni silarluttupilorujussuanngorpoq kalleq innaallattuinnaalluni sialussuartorsuullunilu. Taava illoqarfiup isaaffianut kasuttorpalummat kunngitoqqap isaaffik mapperiartorpaa.

Iserniartoq  sunaaffa tassa kunngip pania, nalunanngeqaarlu silarlussiorsimaqisoq. Nujai atisaalu kuuttuinnaapput, imerlu ateraasaasa nuuisigut ilummut iseraangami kimmiisigut anillattaraaq. Taamaattoq oqarpoq kunngip panigigaani nalinginnaanngitsoq.

”Taamaattuunersoq uppernarsissavarput” kunngip nulia taama isumaliuinnarluni oqarnanili sinittarfiit ilaannut iserpoq, oqorutillu siniffimmiittut tamaasa piiariarlugit siniffiup naqqisa qaavanut eertaq ilivaa. Taava madrassit 20-it eertamut qalliullugit qaleriippai taakkulu suli aamma qaat ullunik imallit 20-it qalliuteqqillugit.

Siniffillu tassa kunngip paniata siniffissaa.

Aqaguani aperaat qanoq sinissimanersoq.

”Ajoraluartumik,” kunngip pania akivoq. ”Unnuarsuaq tamaat sequnnginngigajappunga. Siniffinni soqarsimanerpoq. Alliara manngingaarmat timiga tilluusarsuarnik ulikkaarpoq.”

Taava paasilerpaat kunngip panigigaa nalinginnaanngitsoq madrassit 20-it qaallu 20-it aqqusaalutoriinnarlugit eertaq malugisinnaasimammagu. Kunngip pania naliginnaanngitsoq kisimi taama maaqanngitsigisinnaavoq.

Kunngip ernerata nuliartaaraa nalujunnaaramiuk kunngip panigigaa naliginnaanngitsoq. Eertaq katersugaasivimmut toqqorneqarpoq tillinneqarsimanngikkunilu suli tassaniissalluni.

Ilaa tassa aatsaat oqaluttuaq!

Loading the player ...